"Jamita Syukuran mamasuhi bagas" Psalm 127: 1-3

Huria ni Tuhanta Yesus Kristus..!

Boasa hita ingkon mandok mauliate di ngolunta on…..? Psalmen 107 mandok:  Pardenggan Basa do Ibana jala ro di saleleng ni lelengna do asi ni roha-Na. Dia ma huroha denggan Basa ni Jahowa naung tajalo….! 1. Hipas hita sahat tu sadari on. 2. Boi dipasidung hamu pature bagas sibaganding tua on. Ala ni ido umbahen ta patupa acara on. Jala didok turpukta manogot on….Psalm 127: 1-3 jaha.

Dang ala ni godang nihepeng muna umbahen boi di pature hamu bagas on, dang ala ni hagogo on muna alai holan asi ni rohana sambing. Asa ingkon taingot  tongtong mandok mauliate tu Tuhan I, unang sai lalap holan mangalului angka ondeng.

Huria ni Tuhanta…!

Adong do umpama batak mandok: Pat ni manuk paturengreng, marrara mata mida hepeng, sian umpama on boi buatonta kesimpulan, na mansai penting situtu do hepeng I, jala mempunyai daya tarik na mempesonakan, na boi manarik jolma I tu hangaluton. Adong do na mandok: hepeng do mangatur negara on, molo piningkiran sungguh mengherankan, barang na so berharga I boi mangatur ngolu ni jolma, toho ma nanidok ni angka na malo I, Hepeng on ima; Habang so marhabongong  mardalan so mar pat, manginsir so marimbulu, ibana do na umburju laos ibana do na jumungkat.

Mansai toho do pandohan on sipata, ai boi do rasahononta, songon dia pengaruh ni hepeng I di ngolunta siapari on, sonang manang susa jolma I tergantung tu adong do hepeng na manang dang, ala ni onma umbahen jotjot jolma I menghalalkan segala cara, laho mangalului hepeng i. Lapatanna manangko pe taho asal ma hepeng, manggabusi halak manang mangangkali pe taho asal dalan ni hepeng. Ise ulaning sian hita on na so olo mamora, jala ise na so olo mangomo ? Ra, sude do halak sai mangusahahon pangomoan jala mangalui hamoraon di bagasan ngoluna.

Marasing- asing do dalan ni ganup halak laho mangalului pangmoanna. Maragam cara ditahi jala diula laho mangeahi hamoraon i. Di falsafah ni halak  Batak pe, termasuk do hamoraon songon sada sintasinta ni ngolu na ideal songon na tarida sian ungkapan  “ Hamoraon, Hasangapon, Hagabeon”. Persoalanna nuaeng, beha do hita menilai angka pangomoanta manang hamoraon I ? Beha do hita mangadopi angka arta manang hepeng na adong di hita ? Tongtong do hita mandok mauliate….? Tasadari do na ampuna ni Debata do sude i….? tarmasuk hosanta on….?

Huria ni Tuhanta Jesus.

Molo toho do hita mandok mauliate…tongtong do ringgas hita tumangihon hata-Na i…? Tasadari do na Pasu-pasu ni Jahowa do mambahen mamora, jala dang mardongan hangaluton dibahen tu hita. Manang aha pe na adong di hita, hamoraon, hagabeon nang hasangapon, sude I dang milikta, milik ni Debata do, ala ni ima ingkon manat  hita asa unang tapansuasaehon arta na pinasahat ni Debata, alai asa tapangke tu lomo ni rohaNa.

Unang do gabe holan pinggol-pinggol na badia hita dohot dila-dila na badia, holan na manangihon so dohot pangulaon, jala manghatahon dang mangulahon.  Di nasahali marnipi do Jon Wesly ima na pajongjonghon huria Methodis; di boan suru-suruan ni Debata ma ibana di nipina i tu surgo, diida si Jon Wesly ima di surgo sada meja na mansai balga, jala di ginjang ni meja i peak angka piring dohot dengke pare na ganjang-ganjang, jadi didok ibana ma tu suru-suruan i, ai na holan na mangan do jolma di surgo on…? Boasa peak angka piring dohot dengke pare di meja i ninna ibana, mengkel ma suru-suruan i, jala didok ma, dang piring i, pinggol-pinggol na badia do i, ima angka jolma na ringgas manangihon Hata ni Debata alai dang mangulahon, ujungna pinggol na ima na sahat tu surgo, alai anggo badanna i di api na rokko do ninna suru-suruan i. Jala na ganjang i, ima dila-dila na badia, na jotjot manghatahon Hata ni Debata alai dang hea mangulahon, ujungna holan dila na ima na sahat tu surgo, alai badanna di api na rokko do ninna suru-suruan i. Asa tu dos do hita songoni, molo so taulahon Hata ni Tuhanta i.

Antong binsan di lehon Tuhan i dope tingki di hita, dilehon pasu-pasuNa, bagas na uli on..taharingkothon ma mangulahon lomo ni rohaNa,

Dia ma lomo ni roha ni Debata…?

1. Ringgas hita manangihon HataNai ( Heber 10: 25).
2. Gugun Hata ni Kristus i, maringanan dibagasan hita jala masiajaran huhut masipasingotan hita (Kolose 3: 16).
3. Asa boi taalo dosa i, ta jalo ma lombu-lombu hasintongan sian Tuhan I (Epesus 6:16). Amen.