Rabu, 26 Oktober 2016

Jamita Haheheon Minggu 16 April 2017 1 Korintus 15: 1-4 “Hehe Kristus, Monang Hita”



Patujolo :
Sadari on marpungu do hita mamestahon haheheon ni Tuhanta Jesus, na gabe laos songon tudu-tudu tu haheheonta tu hangoluan na manongtong i.
Haheheon di jaman modern nuaeng on, mansai jotjot gabe perdebatan, suang songon I do nang di tingki ni Ap. Paulus, mansai maol do halak Kristen di tingki I manghaporseai na adong do haheheon muse di angka na porsea di Yesus i. Ai aut sugari dang adong haheheon I, marisuang ma haporseaonta I, jala dang adong gareja di tonga-tonga ni portibi on. Ala ni ima umbahen di surat na parjolo ni ap. Paulus tu halak Korint dipatorang Ap. I do taringot tu haheheon ni Jesus songon sada poda haporseaon na mansai ringkot situtu.  Molo so tutu naung dipahehe Debata Kristus I naung gabe rumar do isi ni Barita na uli i, naung gabe pargabus do Debata. Alai tutu do dipahehe Debata Anakna i, ala ni i sintong do hataNa.
Ala na dipahehe Debata do Kristus i, gabe dihaporseai angka niseanNa do Ibana ro di angka siihuthon Ibana tahe marhatopothon naung tutu do dipahehe Debata Ibana, jala i do sada poda haporseaon ni halak Kristen na mansai porlu situtu.
Alai aha do pangkorhon ni haheheonNa i? Aha do hahonaanna di ngolu ni halak Kristen nuaeng? Taida ma jolo hatorangan ni ap. Paulus na di turpuk on.
Hatorangan ni turpuk :
          Na parjolo, ia haheheon I na marlapatan do i paboa naung mangolu muse Jesus i. Hamamate ni Jesus dang hamamate ala ni sahit manang ala ni hasalaanNa gabe di uhum mate, alai Ibana mate hombar tu na tarsurat I, jala di tingki ngolu ni Jesus pe nunga di pabotohon hian tu angka siseanna na ingkon tumaon na porsuk Ibana jala pola ingkon mate (Mat 16:21; 12: 40) Na mate do Jesus di Jumat Agung, mate di hau pinorsilang alai di ari Minggu dohot di angka ari na mangihut tusi na didapothon Ibana do angka siaseanNa i, songon jolma naung mulak mangolu Ibana. Angka bukti taringot tuson ma na sinurathon ni Ap. Paulus diturpuk on, na gabe hajongjongan ni halak Kristen I di ganup huria.Lapatanna, I do na gabe haluaon ni angka na porsea i.
Naung mate do Kristus ala ni dosanta, songon na tarsurat di buku na badia i, jala na tartanom do Ibana huhut dipangolu di ari patoluhon songon na tarsurat i.
Molo didok ap. Paulus naung dipahehe Jesus di ari patoluhon dung mate di hau pinorsilang i, ndang na marlapatan i na gabe mangolu muse Jesus songon na somal. Alai na mangolu do Jesus dibagasan ngolu na imbaru. Daging ni Jesus na muba do songon ginombarhon ni ap. i gabe daging partondion nang daging parbanuaginjang. Nunga masuk be Jesus i tu panggulmiton na asing na so boi digombarhon dohot pandohan ni jolma.
          Paduahon, Haheheon ni Jesus, ima na songon pardomuan ni asi ni roha ni Debata dohot angka na porsea i. Haheheon ni Jesus mamboan holong ni roha do di angka siseanNa I, suang songon I hasesaan ni dosanasida.
          Patoluhon: Haheheon ni Yesus, I ma na songon sada jou-jou laho manghobasi Ibana. Ai halak na porsea, ndada sae holan na manjalo asi ni roha ni Debata sambaing, alai ingkon pasahatonna do dirina tu Tuhan Jesus I jala ingkon mangolu do ibana mangihuthon aturan na imbaru, ima na dibagasan Kristus. Mangihuthon Ap. Paulus, jou-jou laho manghobasi Jesus na marlapatan do I, ingkon gabe parbarita na uli na sa na porsea di Ibana.
          Paopathon: Haheheon ni Kristus I, I do na gabe tiruan ni haheheon ni sude jolma na porsea di Ibana, Yesus do na gabe patujolo ni haheheon ni sude jolma, hehe Ibana gabe hamonangan di hita. Asa haheheon ido na gabe sihirimon ni halak Kristen, ai nasa na porsea di Ibana partohap do I di haheheonNa/di hangoluanNa (Joh 11:25).
Pangarimpunan/si pahusor-husoron;
  1. Haheheon ni Jesus sian na mate, naeng ma tarida di ngolu ni ganup na porsea di Ibana. Ai haheheon I do mamboan hita tu ngolu na imbaru. Ai molo naung dibagasan Kristus halak, naung pinaimbaru ma I, nunga be salpu ngolu na buruk I, nunga be soluk ngolu na imbaru.
  2. Ia haheheon ni Tuhan Jesus, I do na songon jaminan nang di haheheon ni saluhut jolma angka na porsea di Jesus i. Na tutu do adong haheheon ni angka na mate, jala na gabe patujolo ni haheheon ni angka na porsea ido haheheon ni Jesus i.
  3. Haheheon ni Jesus sian na mate I do na gabe ojahan ni Barita na Uli, molo parjambar hita di hamamate ni Kristus I, laos parjambar do hita nang di haheheonNa, ai molo tahaposi naung mate Kristus I jala hehe muse boanon ni Jesus do nang hita rap dohot Ibana. Ido Alana umbahen dang pola ma biar be hita mida hamatean I, ai ingkon hehe do muse angka na mate di bagasan Ibana.
  4. Kristus nungga hehe sian na mate, tanda ni hamonanganna do I, sorop ni hamatean i/dosa I nunga di taluhon Ibana, asa monang do Ibana, monang nang hita. Amen
Pdt. Rosevelt. H.L. Tobing, S.Th.MA

Tidak ada komentar: